羅毓儀專訪｜羅毓儀親揭自卑底拍攝壓力爆煲崩潰 含淚感激母親犧牲付出

在《巾幗梟雄之懸崖》中Yuki夢想成真能與偶像黎耀祥合作令其興奮不已，她接受TVB.com專訪感激對方分享演戲心得，令其獲益良多：「有場戲講我同祥哥表白 ， 呢場我覺得係好高難度，因為你對佢有好多唔同感情喺入面，又鍾意又係救命恩人， 嗰種情係好多層次，所以我記得場與場之間都有把握機會請教祥哥呢類型嘅戲應該點樣做同準備。」

Yuki指祥哥教她看劇本並非單純地看，而是需要從對白中想像整個拍攝畫面，「每句對白嘅快慢、強重弱輕要點樣分配、邊啲句子係重點， 作為演員就要用角色嘅思維去諗點樣去講出嚟，雖然我哋合作嘅場口唔多，但短短幾場戲已經學到唔少嘢。」

劇中她演17歲「澄澄」被網民大讚無違和感，一直以「BabyFace」見稱的她自言這個標籤有好有壞：「的確有啲人因為你個樣細個會照顧你多啲；但亦有啲人會覺得你細個唔識嘢，變相覺得你唔專業或者覺得你好蝦 ，所以童顏只係一個形容詞 ，你會受到點樣嘅對待，都要睇對你嘅係咩人。」

她直言特別在入行初期的感受甚深，全因當時是新人，在片場根本沒有人認識她，故難免被人有所質疑，「我都係一個超高敏嘅人， 你會感受到對手或者工作人員對你有疑問嘅眼光，但自己有做功課背好對白，盡心盡力去演，就係咁慢慢被導演監製見到自己嘅努力。」

由於Yuki入行以來屢演少女角色，更有「御用學生妹」的稱號，難怪令觀眾認為其樣子被局限，對此她指初時對這些的標籤沒想太多，反而感激有這些稱號令其很快被人認識，不過她深明在此階段亦需要有所轉變，而她提到早前拍畢的《特勤女團》便是新的突破，讓觀眾會有驚喜。

而且，她指劇中前輩的一句話，令其十分感動，讓她要相信自己，「佢同我講你係演員，外形唔係一切，反而你善用到自己號外形同特點， 做到一個只有你可做到嘅角色咁就係能人所不能。」

即使獲得前輩甚至監製的鼓勵，Yuki自言仍信心不足，全因由細到大也是「自卑底」，不時質疑自己，「有時啲人讚我嘅嘢，我只會信一半以下， 但當你話我唔好，我就會放大10倍，不過當然監製導演讚我都會開心，但我都係開心一陣就好快會諗係咪真係好㗎，如果下次做唔番咁好就大件事。」

有此性格，原來全因當年她被父親的一句話影響，Yuki說：「細個考試考到100分或者高名次會好自滿同屋企人講，我Daddy就話『驕傲使人退步，謙虛使人進步』，令到我依家都好深刻，所以由嗰時開始我已經覺得唔可以驕傲自滿，反而要不停諗點樣做得更好。」

雖然自我要求高是好事，但凡事不可極致，難怪她直認時刻保持這個心態相當辛苦，故現時的她學習如何調節，不要凡事想到最壞方向，而且，她深明如何為「好」是很難判斷，「 有時自己覺得好，但畫面出到嚟係唔係好或者觀眾導演係咪鍾意；另一邊自己覺得唔好，但其他人覺得唔錯，所以自己都慢慢學緊點樣拿捏同調節自己嘅諗法。」

入行5年的她，在早前拍畢的《特勤女團》認為是近年首嘗最辛酸的一次，皆因今次劇中戲份甚重，每天睡眠不足， 生理時鐘反轉，引致情緒大起大落：「最初係經歷一段haper期好似飲咗20罐咖啡時刻都好開心精神，但呢個情況只維持到頭半個月，之後就會經歷一段極度憂鬱嘅狀態， 突然覺得個世界好灰，但明明冇發生過任何事。」

Yuki自爆在拍攝放飯時間突然情緒崩潰爆喊：「嗰日我要用食飯時間轉妝，轉完就要入廠，但其實嗰刻覺得好肚餓 ，但都決定轉咗妝驚影響開工進度，搞掂後仲有少少時間就去買咗個飯食，點知食食下我突然爆喊，喊到收唔到聲，完全唔知道自己發生咩事，先令我知道原來情緒爆煲。」

而且，因她首次經歷如此密集式的拍攝，經驗不足下在一場重頭戲失準，令其很有挫敗感，「嗰場重頭戲我喺開拍前幾個星期已經做好晒功課同背熟對白，點知到開拍嗰日我外景接廠景 ，開咗近24小時，到拍嘅時候我突然個人好似抽空咗，連對白都背唔出。」

她指當日回家後為此爆喊，並問導演可否給其多次機會重拍，「但佢同我講冇喇，就算畀多次機會我都係做唔到，我覺得自己好無用，明明準備咗咁耐，但最後出嚟變成咁，所以今次嘅經歷令我知道就算幾攰都好，都一定要演到戲，呢個先係專業演員。」

處於事業的搏殺期，Yuki自言沒有後顧之憂放心工作，全因母親無微不至的照顧，永遠以行動支持，成為其最大的「避風港」，她含淚說：「 因為拍劇真係會照顧唔到自己，同埋返到屋企已經好攰， 但媽咪會幫我分擔晒所有嘢，我只需要專心做好我嘅工作就夠。」

「佢日日都會問我早餐想食咩， 消夜使唔使買定嘢食畀我， 佢知道我要食嘢但又要減肥 ，每日去街市都會買好多肉，同唔同有營養嘅食物， 因為佢驚我只係食一種肉會厭 ，會幫我諗好多嘢。」Yuki說。

她再舉例母親的窩心行為，永遠也會知道其需要，令其極為感動，「我好大頭蝦 ，成日都唔見嘢或者跌爛嘢 ，好似年中都唔知打爛咗幾多個粉餅， 我每次同佢求救， 佢都會同我講『唔使驚呀，屋企有後備，你唔使特登放咗工出去買 』就係因為佢每次都會買定幾個放喺屋企，所以佢係我最強後盾。」

而且，每次有關Yuki的報道，其母親也是最快追看，即使看到負評，她哽咽指母親從不會向其表露不開心一面，「我同媽咪最似嘅地方係大家只想喺對方面前開心 ，大家都係報喜不報憂嘅人，即使我拍劇唔開心都唔會同佢講，而係自己消化咗先。」正正因母親背後默默的支持，成Yuki工作的最大推動力，努力不懈做得更好！