美食新聞報道｜「星級飯腳」蘇麗珊帶路揾食 尖沙咀酒樓家常菜 回味屋企情意結

今集《美食新聞報道》請來「星級飯腳」蘇麗珊(Cecilia)，身兼演員和歌手的她，今次帶大家及主持蔡景行(行仔)一齊到尖沙咀揾食！而第一站就是到滿載她中學回憶的茶記，Cecilia表示：「讀中學時，返學前一定要食早餐，我好期待早餐。而每次食茶記，都會諗返起個回憶，好似好開心同好滿足嘅感覺！」

第一站：尖沙咀加連威老道

Cecilia指每次到這間茶記都會叫「芝士番茄雞絲撈蛋麵」，而行仔就試食「芝士番茄牛肉麵」。Cecilia分享自己不喜歡把所有餸及湯撈在一起吃，反而喜歡先夾少少麵，再加上湯底、少許芝士和雞肉，這樣可以一匙有齊所有食材，再一啖吃下。二人都大讚湯底有很濃的番茄味，十分美味。

接着，二人就試食西多士，行仔在落糖漿前先問Cecilia喜歡多糖還是少糖？結果甜派的她選了多糖，這個西多士非常鬆軟、足料，Cecilia表示：「佢個花生醬搽到邊，唔會只集中喺中間。」

二人邊食邊閒談，Cecilia分享自己讀書時每次去茶記都是跟同學一起去，「我中學有一班女仔friend，6個人，我哋係一group女仔friend，到而家都仲有聯絡，好多回憶都係同佢哋一齊。」行仔聽後笑言：「多謝你讓我介入你嘅回憶當中。」，讓Cecilia有點不知所措。

第二站：尖沙咀柯士甸路

Cecilia帶行仔到尖沙咀柯士甸路繼續揾食，原來她之前在附近學唱歌，所以差不多一星期來一次。熟路的她，更在路過一間餐廳時，向行仔介紹：「呢間湯好好飲，而且開到早上6點，變咗有時想食宵夜或拍完嘢都可以嚟食。」

他們來到酒樓，行仔好奇為何Cecilia會帶他到酒樓用膳，她解釋：「細個同家人食飯，10次有10次都係揀酒樓，自己搬出嚟都差不多10年啦，有啲掛住同屋企人食飯嘅感覺，我覺得係有啲情意結。」

Cecilia指這碟「避風塘瀨尿蝦」很特別，因為已拆殼起肉，進食很方便，而且非常美味，所以她就算對蝦有敏感，仍會為這碟瀨尿蝦而破戒。行仔在試食後表示；「啲人成日講拆咗殼煮肉味無哂，但呢個唔會，仍能保持肉汁同肉質，而且外脆內鮮甜。」

當「生炒糯米飯」上桌時，Cecilia才醒起自己忘記走青，但指可以慢慢夾走佢，行仔笑言：「好呀，呢個係好有情趣嘅活動。」，Cecilia聽後開懷大笑。這碟糯米飯加入了炒蛋絲，口感變得豐富，而且飯粒不會太硬，粒粒分明。

行仔看到賣相特別的「冰鎮咕嚕肉」即一臉期待，Cecilia提醒這道菜要先冰敷一下，肉才會更脆。行仔試食一件後，忍不住讚嘆：「嘩⋯⋯好好食！」，Cecilia笑問：「定係戲嚟架？」行仔忍笑說：「我啲戲唔好。」Cecilia笑着認同：「好浮誇喎你！」行仔接着讚：「佢冰鎮咗一陣，個皮已經唔係佢認識嘅咕嚕肉，外面脆到有啲似餅乾，同埋凍咗之後，個酸酸甜甜味更出。」

泰國人主理的正宗家鄉味

尖沙咀傳統泰式大排檔

廖慧儀(Jessica)今集接力同大家在尖沙咀試食泰國菜！這個泰式大排檔由兩位老闆打理，其中一位更是泰國人，務求帶最正宗傳統的泰式風味給食客。

木瓜沙律，配合泰國東北部常用調味料--臭魚醬，Jessica指這個醬聞起來有點鹹魚味。她試食後指：「個醬都幾辣，有啲似泰式辣醬，個辣好有後勁，好香辣，加埋生菜食感覺好清新。」

燒牛肉為其中一款必食推介，「肉入口即融與有咬口之間，點醬食好香辣。」

醉貓炒河，「河粉掛滿了汁和肉碎，啖啖都有肉，好惹味！」

星座冰室

尖沙咀加連威老道58號地舖

龍門金閣海鮮酒家

尖沙咀柯士甸路18B號地舖

Soi.29

尖沙咀寶勒巷29寶昌商業大廈地舖